ທີມຊາດລາວ U16 ເກັບຕົວຝຶກຊ້ອມກຽມເຂົ້າຮ່ວມແຂ່ງຂັນບານເຕະຊິງແຊັມອາຊຽນ ທີມຊາດລາວ ຮຸ່ນອາຍຸບໍ່ເກີນ16 ປີ ຫຼື U16 ໄດ້ເລີ່ມເກັບຕົວຝຶກຊ້ອມຕັ້ງແຕ່ວັນທີ 01 ພຶດສະພາ 2024 ເປັນຕົ້ນມາ ໂດຍມີ ທ່ານ ກັນລະຍາ ສີສົມຫວັງ ເປັນຫົວໜ້າຄູຝຶກ ຊຶ່ງໃນເບື້ອງຕົ້ນໄດ້ຮຽກຕົວນັກກິລາເຍົາວະຊົນ ຈຳນວນ 39 ຄົນ ຈາກຫຼາຍສະໂມສອນ, ທັງຈາກບັນດາແຂວງຕ່າງໆໃນທົ່ວປະເທດ, ສູນຝຶກແອບພາຍໃນ ແລະ ຕ່າງປະເທດ ເຂົ້າຮ່ວມຝຶກແອບເພື່ອເລືອກເຟັ້ນເອົານັກກິລາທີ່ມີຄວາມພ້ອມທັງຮ່າງກາຍ ແລະຈິດໃຈ, ມີທັກສະຄວາມສາມາດທີ່ໂດດເດັ່ນ ໂດຍຈະມີການຄັດນັກກິລາອອກຢ່າງເປັນໄລຍະຈົນກ່ວາຈະໄດ້ນັກກິລາທີ່ມີຄວາມພ້ອມ 23 ຄົນສຸດທ້າຍ ເພື່ອກຽມເຂົ້າຮ່ວມແຂ່ງຂັນບານເຕະຮຸ່ນບໍ່ເກີນ 16 ປີ AFF ASEAN Boy' Championship 2024 ໃນລະຫວ່າງວັນທີ 21 ມີຖຸນາ ຫາ 4 ກໍລະກົດ 2024 ທີ່ ປະເທດ ອິນໂດເນເຊຍ.