ສະຫະພັນບານເຕະແຫ່ງຊາດລາວ (ສຕລ) ໄດ້ປະກາດແຕ່ງຕັ້ງ ທ່ານ ຄໍລະເດດ ພອນພະຈັນ ເປັນຫົວໜ້າ ຄະນະນໍາຂອງທີມຊາດລາວ U-17 ແລະ ທີມຊາດຊາຍ ຊຸດກຽມ SEA Games 2025, ເຊິ່ງ ທ່ານ ຄໍລະເດດ ໃນອະດີດເປັນນັກກິລາບານເຕະທີມຊາດ ຊຸດໄປແຂ່ງຂັນ SEA Games 1997 ຢູ່ປະເທດອິນໂດເນເຊຍ ແລະ Asian Games 1998 ຢູ່ປະເທດໄທ. ປະຈຸບັນ, ທ່ານ ຄໍລະເດດ ເປັນຫນຶ່ງໃນສະມາຊິກຂອງຄະນະບໍລິຫານງານ ສຕລ ສົກປີ 2024 - 2028.

          ຜ່ານການຈັບສະຫຼາກທີມຊາດລາວ U17 ໄດ້ຖືກຈັດຢູ່ ກຸ່ມ B ຮ່ວມກັບ ເຢເມນ, ຄີກິສຖານ (ເຈົ້າພາບ), ກໍາປູເຈຍ, ກວມ ແລະ ປາກິດສະຖານ. ໂດຍປະຈຸບັນທີມຊາດລາວ U17 ແມ່ນໄດ້ມີການເກັບໂຕຝຶກຊ້ອມຢູ່ສູນຝຶກບານເຕະ ຈຳປີ-ຈຳປາ (ຫຼັກ 16) ເຊິ່ງໄລຍະການຊ້ອມມີດັ່ງນີ້:

1. ໄລຍະທີ 1: ເອີ້ນນັກກິລາເປົ້າໝາຍເຂົ້າມາຝຶກຊ້ອມ ຈຳນວນ 43 ຄົນ ລະຫວ່າງວັນທີ 17 – 26 ກັນຍາ 2025

2. ໄລຍະທີ 2: ຄັດນັກກິລາຈາກໄລຍະທີ່ 1 ໃຫ້ເຫລືອ 35 ຄົນ ເພື່ອຝຶກຊ້ອມ ລະຫວ່າງວັນທີ 6 – 21 ຕຸລາ 2025

3. ໄລຍະທີ 3: ກະກຽມໄປອຸ່ນເຄື່ອງຢູ່ຕ່າງປະເທດ ກ່ອນຕັດໂຕນັກກິລາໃຫ້ເຫລືອ 23 ຄົນ ລະຫວ່າງວັນທີ 29 ຕຸລາ - 7 ພະຈິກ 2025.

            ໃນຊ່ວງໄລຍະຝຶກຊ້ອມ ທ່ານ ຄໍລະເດດ ພອນພະຈັນ ໄດ້ລົງຕິດຕາມການຝຶກຊ້ອມ, ການກິນ-ຢູ່ ຂອງນັກກິລາຢ່າງໃກ້ຊິດ ພ້ອມທັງໃຫ້ຄໍາແນະນໍາ ແລະ ສະແດງຄວາມຊົມເຊີຍນັກກິລາທຸກຄົນທີ່ເອົາໃຈໃສ່ໃນການຝຶກຊ້ອມນັບ ແຕ່ມື້ທໍາອິດຂອງການເຂົ້າຝຶກຊ້ອມຢູ່ສູນ ແລະ ໄດ້ກ່າວວ່າ: “ການແຂ່ງຂັນບານເຕະຄັ້ງນີ້ ທຸກຄົນຄືຄວາມຫວັງຂອງຊາດ ແລະ ນີ້ເປັນການເກັບກ່ຽວປະສົບການຕົວຈິງເພື່ອປູເສັ້ນທາງນັກກິລາບານເຕະອາຊີບໃຫ້ນ້ອງນັກກິລາທຸກຄົນໃນອະນາ ຄົດ ດັ່ງນັ້ນ, ຢາກຝາກໃຫ້ທຸກຄົນ ທັງນັກກິລາ ແລະ ຄະນະຄູຝຶກ ໃຫ້ຮ່ວມແຮງຮ່ວມໃຈກັນສາມັກຄີເພື່ອສ້າງຜົນງານ ອອກມາໃຫ້ດີທີ່ສຸດ ແລະ ສຸດທ້າຍຕ້ອງຂໍຂອບໃຈທຸກຄົນທີ່ເສຍສະລະຄວາມສຸກສະບາຍສ່ວນໂຕ ເພື່ອທຸ້ມເທ ເຫື່ອແຮງ, ອົດທົນຝຶກຊ້ອມ ແລະ ເປັນຕົວແທນຂອງປະເທດຊາດ.”

          ຂະນະດຽວກັນ ທ່ານ ຈອງ ຊອງ ຊົນ (Jong Song-chon) ຫົວໜ້າຄູຝຶກທີມຊາດລາວ U-17 ກ່າວວ່າ: “ເປັນຫຍັງພວກເຮົາຕ້ອງຊ້ອມໜັກ ແລະ ເປັນຫຍັງຂ້ອຍຈຶ່ງເລືອກນັກເຕະທີ່ທຸ້ມເທ, ອົດທົນ ແລະ ຫຼິ້ນໄດ້ເກີນຮ້ອຍ ເນື່ອງຈາກພວກເຮົາຕ້ອງກຽມພ້ອມໃຫ້ດີທີ່ສຸດ ເພາະລາຍການນີ້ເປັນລາຍການໃຫຍ່ ແລະ ທີ່ສໍາຄັນພວກເຮົາຢູ່ໃນກຸ່ມ ທີ່ມີການແຂ່ງຂັນເຖິງ 5 ນັດ ພ້ອມທັງແຂ່ງຂັນຢ່າງຕໍ່ເນື່ອງ (ແຂ່ງບາມື້). ດັ່ງນັ້ນ, ຂ້ອຍຕ້ອງການນັກເຕະທີ່ມີພາລະກຳລັງ ແລະ ທຸ້ມເທສຸດໃຈ ເຖິງຈະອິດເມື່ອຍເທົ່າໃດກໍຕ້ອງພ້ອມລົງສະໜາມຕະຫຼອດເວລາ ເພາະນີ້ຄືການຮັບໃຊ້ຊາດ ແລະ ເຮັດເພື່ອປະເທດລາວ.”

           ຫົວໜ້າຄູຝຶກທີມຊາດລາວ U-17 ກ່າວອີກວ່າ: “ຊົມເຊີຍນັກກິລາທຸກຄົນທີ່ທຸ້ມເທຫຼາຍໃນການຝຶກຊ້ອມ ຕະຫຼອດໄລຍະທີ່ຜ່ານມາ ແນ່ນອນນັກກິລາທຸກຄົນມີຄວາມສາມາດໃກ້ຄຽງກັນຫຼາຍ ແລະ ເຮັດໃຫ້ຕ້ອງໃຊ້ຄວາມຄິດຫຼາຍ ໃນການເລືອກຕັດນັກກິລາອອກ ເຊິ່ງຈະຕ້ອງໄດ້ປຶກສາພາຍໃນຄະນະຄູຝຶກອີກຄັ້ງໜຶ່ງ. ຢ່າງໃດກໍຕາມ ຜູ້ໃດທີ່ບໍ່ຖືກຄັດ ເລືອກຊຸດນີ້ ແມ່ນບໍ່ຕ້ອງເສຍໃຈ ໃຫ້ພະຍາຍາມກັບໄປຝຶກຝົນຕົນເອງ, ປັບປຸງ ແລະ ກັບມາຄັດເລືອກທີມຊາດໃໝ່, ສ່ວນຜູ້ທີ່ຖືກເລືອກກໍຂໍໃຫ້ເອົາໃຈໃສ່ພັດທະນາຕົນເອງໃຫ້ດີຂຶ້ນໄປເລື້ອຍໆ.”

ສ່ວນຕາຕະລາງການແຂ່ງຂັນຂອງທີມຊາດລາວ U-17 ທີ່ ເມືອງ ບິສເຄກ, ຄີກິສຖານ ມີລາຍລະອຽດດັ່ງຕໍ່ໄປນີ້:

- ວັນທີ 22/11/2025 ເວລາ 16:00 ໂມງ (ເວລາໃນປະເທດລາວ) ທີມຊາດລາວ ພົບ ທີມຊາດກວມ

- ວັນທີ 24/11/2025 ເວລາ 16:00 ໂມງ (ເວລາໃນປະເທດລາວ) ທີມຊາດລາວ ພົບ ທີມຊາດກໍາປູເຈຍ

- ວັນທີ 26/11/2025 ເວລາ 16:00 ໂມງ (ເວລາໃນປະເທດລາວ) ທີມຊາດປາກິດສະຖານ ພົບ ທີມຊາດລາວ

- ວັນທີ 28/11/2025 ເວລາ 20:00 ໂມງ (ເວລາໃນປະເທດລາວ) ທີມຊາດລາວ ພົບ ທີມຊາດຄີກິສຖານ

- ວັນທີ 30/11/2025 ເວລາ 20:00 ໂມງ (ເວລາໃນປະເທດລາວ) ທີມຊາດເຢເມນ ພົບ ທີມຊາດລາວ

               ສ່ວນການແຂ່ງຂັນ SEA Games ຄັ້ງທີ່ 33 ທີ່ຈະຈັດຂຶ້ນໃນປະເທດໄທ ລະຫວ່າງ ວັນທີ 9 – 22 ທັນວາ 2025 ປະຈຸບັນມີທັງຫມົດ 10 ທີມຕອບຮັບເຂົ້າຮ່ວມການແຂ່ງຂັນ. ສໍາລັບການຈັບສະຫລາກແບ່ງກຸ່ມ ທາງເຈົ້າພາບຈະຈັດຂຶ້ນໃນເດືອນ 10 ໄວໆນີ້. ຖ້າມີຄວາມຄືບຫນ້າແນວໃດ ທາງ ສຕລ ຈະມາສົ່ງຂ່າວໃຫ້ແຟນບານຮູ້ເພີ່ມເຕີມ.