ການແຂ່ງຂັນກິລາບານເຕະ ລາວໂຕໂຢຕ້າ ພາກໃຕ້ ຈໍາປາສັກ ລາວລີກ 2 ປະຈໍາປີ 2026 ໄດ້ເລີ່ມເປີດການແຂ່ງຂັນຂື້ນແລ້ວຢ່າງເປັນທາງການ ໃນຕອນບ່າຍຂອງວັນທີ 8 ພຶດສະພາ 2026 ທີ່ຜ່ານມາ ຢູ່ທີ່ສະໜາມກິລາແຂວງຈໍາປາສັກ,ໂດຍການໃຫ້ກຽດເປັນປະທານຂອງ ທ່ານ ສົມບູນ ເຮືອງວົງສາ ຄະນະປະຈໍາພັກແຂວງ, ຮອງປະທານຄະນະກຳມະການປົກຄອງແຂວງຈໍາປາສັກ, ທ່ານ ຄໍາແພງ ວົງຂັນຕີ ຮອງປະທານສະຫະພັນບານເຕະແຫ່ງຊາດລາວ, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ຄະນະບໍລິຫານງານສະຫະພັນບານເຕະແຫ່ງຊາດລາວ ທັງເປັນປະທານສະຫະພັນກິລາບານເຕະແຂວງຈໍາປາສັກ, ທ່ານ ກິດດາ ພົມສົມບັດ ຜູ້ຈັດການ ອາວຸໂສ ທົ່ວໄປ ບໍລິສັດ ລາວໂຕໂຢຕ້າພາກໃຕ້ ຈໍາກັດຜູ້ດຽວ ພ້ອມດ້ວຍບັນດາທ່ານການນໍາພັກ-ລັດ, ນັກທຸລະກິດ, ແຂກຖືກເຊີນ, ຄະນະຈັດການແຂ່ງຂັນ, ວິຊາການຂອງບໍລິສັດ ລາວໂຕໂຢຕ້າ ພາກໃຕ້ ຈໍາກັດຜູ້ດຽວ,ຄະນະຄູຝຶກ ແລະ ນັກກິລາ ພ້ອມດ້ວຍແຟນບານ ເຂົ້າຮ່ວມຢ່າງພ້ອມພຽງ. ໃນພິທີ, ທ່ານ ແກ້ວລັດຕະນະ ສີຫາວົງ ປະທານສະຫະພັນກິລາບານເຕະແຂວງໄດ້ມີຄໍາເຫັນສະເໜີຈຸດປະສົງ ແລະ ລາຍງານກ່ຽວກັບການກະກຽມຄວາມພ້ອມຮອບດ້ານໃຫ້ແກ່ການຈັດການແຂ່ງຂັນ ເຊິ່ງທ່ານໃຫ້ຮູ້ວ່າ: ການແຂ່ງຂັນກິລາບານເຕະ ລາວໂຕໂຢຕ້າ ພາກໃຕ້ ຈໍາປາສັກ ລາວລີກ 2 ປະຈໍາປີ 2026 ຈະໄດ້ເປີດການແຂ່ງຂັນຢ່າງເປັນນັບແຕ່ວັນທີ 8 ພຶດສະພາເປັນຕົ້ນໄປ ແລະດໍາເນີນການແຂ່ງຂັນໄປເຖິງ ວັນທີ 16 ສິງຫາ 2026 ໂດຍມີ 8 ສະໂມສອນກິລາບານເຕະເຂົ້າຮ່ວມແຂ່ງຂັນ ຄື

1. ສະໂມສອນບານເຕະ ສຸລິຍະວົງ (ແຊ້ມເກົ່າ).

2. ສະໂມສອນບານເຕະ ໂຮງຫຼໍ່ ການໄຊ.

3. ສະໂມສອນບານເຕະ ບາຈຽງ.

4. ສະໂມສອນບານເຕະ ປິ່ນແກ້ວ.

5. ສະໂມສອນບານເຕະ ພົມປັນຍາ ຟຣາມ.

6. ສະໂມສອນບານເຕະ ຊ້າງເຜືອກ.

7. ສະໂມສອນບານເຕະ SP Sign & Led.

8. ສະໂມສອນບານເຕະ ປາຕິຫານ.

         ສຳລັບສະໂມສອນທີ່ຊະນະເລີດຈະໄດ້ຮັບຂັນ, ຫລຽນ ແລະ ເງິນລາງວັນ 25 ລ້ານກີບ, ອັນດັບ 2 ຈະໄດ້ຮັບຫລຽນ ແລະ ເງິນລາງວັນ 12 ລ້ານກີບ ແລະ ອັນດັບ 3 ຈະໄດ້ຮັບຫລຽນ ແລະ ເງິນຈຳນວນ 8 ລ້ານກີບ, ນອກນັ້ນ, ຍັງມີລາງວັນຄູຝຶກດີເດັ່ນ, ນັກກິລາດີເດັ່ນ, ດາວຍິງສູງສຸດ.

          ສ່ວນຜົນການແຂ່ງຂັນອາທິດຜ່ານມາມີການແຂ່ງຂັນ 4 ຄູ່ມີດັ່ງນີ້: ປິ່ນແກ້ວ ຊະນະ SP Sign & Led 6-0, ພົມປັນຍາ ຟຣາມ ເສຍໃຫ້ ສຸລິຍະວົງ 0-5, ບາຈຽງ ສະເຫມີ ໂຮງຫຼໍ່ ການໄຊ ແລະ ຊ້າງເຜືອກ ຊະນະ ປະຕິຫານ 11-0.

          ສະໂມສອນ ທີ່ຊະນະເລີດລາຍການດັ່ງກ່າວນີ້ ແມ່ນຈະໄດ້ຮັບສິດເຂົ້າຮ່ວມ ການແຂ່ງຂັນບານເຕະ ຊີງຂັນພະນະທ່ານນາຍົກລັດຖະມົນຕີແຫ່ງ ສປປ ລາວ ລະດູການ 2026/27 ໃນຖານະແຊ້ມ ລາວລີກ 2 ແຂວງຈຳປາສັກ ພ້ອມທັງໄດ້ຮັບສິດເລື່ອນຊັ້ນຂຶ້ນສູ່ ລາວລີກ 1 ລະດູການ 2027/28 ຖ້າຫາກຜ່ານເງື່ອນໄຂ.