ໃນຕອນບ່າຍຂອງວັນທີ 13 ມັງກອນ 2026 ຢູ່ທີ່ ສໍານັກງານໃຫຍ່ ທະນາຄານ ເອັສທີ ໄດ້ຈັດພິທີເຊັນສັນຍາໃຫ້ການສະໜັບສະໜູນການແຂ່ງຂັນກິລາບານເຕະຊີງຂັນ ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ລະຫວ່າງ ສະຫະພັນບານເຕະແຫ່ງຊາດລາວ (ສຕລ) ແລະ ທະນາຄານ ເອັສທີ ແລະ ບໍລິສັດ ເອັສທີ ກຣຸບ ຈຳກັດຜູ້ດຽວ. ໃຫ້ກຽດເຂົ້າຮ່ວມພິທີໂດຍ ທ່ານ ໄຊຍາ ໄຊສຸລິວົງ ຮອງປະທານ ສະພາບໍລິຫານ ທະນາຄານ ເອັສທີ ແລະ ບໍລິສັດ ເອັສທີ ກຣຸບ ຈໍາກັດ, ທ່ານ ເອກະລາດ ລັດຕະນະຈານ ຮັກສາການ ຜູ້ອຳນວຍການ ທະນາຄານ ເອັສທີ, ທ່ານ ພຸດທະກອນ ຈັນໂທ ຮອງຜູ້ອໍານວຍການ ທະນາຄານ ເອັສທີ, ທ່ານ ອານຸກອນ ສຸທຳມະວົງ ຮອງຜູ້ອໍານວຍການ ທະນາຄານ ເອັສທີ, ທ່ານ ສັນຍາໄຊ ຣາຊຈັກ ຫົວໜ້າພະແນກຫ້ອງການ ບໍລິສັດ ເອັສທີ ກຣຸບ ຈຳກັດຜູ້ດຽວ. ສ່ວນຝ່າຍ ສຕລ ປະກອບມີ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, ທ່ານ ນາງ ຍອດແກ້ວ ພາວະດີ ເລຂາທິການ ສຕລ ແລະ ທ່ານ ຈັນທະວົງ ສີລິມະໂນທຳ ຮອງເລຂາທິການ ສຕລ ພ້ອມດ້ວຍບັນດາພະນັກງານຈາກທັງສອງພາກສ່ວນກໍ່ໄດ້ເຂົ້າຮ່ວມຢ່າງພ້ອມພຽງ.

            ໃນພິທີ ທ່ານ ວີເພັດ ສີຫາຈັກຣ, ປະທານ ສຕລ ໄດ້ກ່າວສະແດງຄວາມຂອບໃຈຢ່າງສູງມາຍັງທັງສອງຄະນະບໍລິຫານຂອງ ທະນາຄານ ເອັສທີ ແລະ ບໍລິສັດ ເອັສທີ ກຣຸບ ຈຳກັດຜູ້ດຽວ ທີ່ໄດ້ໃຫ້ຄວາມໄວ້ວາງໃຈ ສຕລ ໂດຍການໃຫ້ທຶນສະໜັບສະໜູນເພື່ອມາໝູນໃຊ້ປິ່ນອ້ອມໃນການຈັດການແຂ່ງຂັນກິລາບານເຕະ ຊີງຂັນ ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ເປັນໄລຍະເວລາ 2 ລະດູການ ລະຫວ່າງ ປີ 2025 – 2027. ຖືວ່າເປັນການໃຫ້ການສະໜັບສະໜູນຄັ້ງທີ່ 2 ເພາະທາງ ທະນາຄານ ເອັສທີ ເຄີຍໃຫ້ການສະໜັບສະໜູນ ສຕລ ໃນການເປັນເຈົ້າພາບຈັດການແຂ່ງຂັນ ບານເຕະຊີງແຊ້ມອາຊີ ຮຸ່ນອາຍຸບໍ່ເກີນ 20 ປີ (ຮອບຄັດເລືອກ) ທີ່ ສປປ ລາວ ໄດ້ຮັບກຽດເປັນເຈົ້າພາບໃນປີ 2022. ການສະໜັບສະໜູນຂອງທ່ານໃນຄັ້ງນີ້ ກໍໄດ້ສະທ້ອນໃຫ້ເຫັນເຖິງວິໄສທັດທີ່ກວ້າງໄກຂອງຄະນະບໍລິຫານ ເພາະການປະກອບສ່ວນຂອງພວກທ່ານ, ບໍ່ແມ່ນພຽງແຕ່ຊ່ວຍສົ່ງເສີມພັດທະນາວົງການກິລາບານເຕະລາວ ແຕ່ຍັງໄດ້ກວມລວມໄປເຖິງການພັດທະນາວຽກງານສັງຄົມ ສົ່ງເສີມໃຫ້ເຍົາວະຊົນລາວມາສົນໃຈໃນການຫຼິ້ນກິລາ ເພື່ອຫ່າງໄກຈາກຢາເສບຕິດ.

             ຈາກນັ້ນ ທ່ານ ເອກະລາດ ລັດຕະນະຈານ ກໍ່ໄດ້ປະກອບຄຳເຫັນໂດຍ ໄດ້ກ່າວວ່າ: “ການສະໜັບສະໜູນຄັ້ງນີ້ ເປັນການສົ່ງເສີມໃຫ້ກິລາບານເຕະລາວ ມີສັກກະຍະພາບ ພັດທະນານັກກິລາພາຍໃນ ໃຫ້ສາມາດແຂ່ງຂັນໃນລະດັບພາກພື້ນ ແລະ ລະດັບຊາດຢ່າງມີຜົນສຳເລັດ ແລະ ພວກເຮົາໃນນາມຜູ້ໃຫ້ການສະໜັບສະໜູນ ກໍຍິນດີທີ່ຈະໃຫ້ການສົ່ງເສີມທັງສະຫະ ພັນ ແລະ ນັກກິລາ ໃຫ້ມີຂວັນກຳລັງໃຈອັນເຂັ້ມແຂງ ແລະ ມີການພັດທະນາທີ່ດີຍິ່ງຂຶ້ນຕະຫຼອດໄປ ກຸ່ມບໍລິສັດ ST ແລະ ST Bank ພວກເຮົາພ້ອມທີ່ຈະສະນັບສະໜູນ ແລະ ຢືນຄຽງຂ້າງການພັດທະນາກິລາລາວ ລວມທັງພັດທະນາໃນທຸກໆດ້ານເພື່ອຄຽງຂ້າງ, ມອບການບໍລິການ ແລະ ຜະລິດຕະພັນທີ່ທັນສະໃໝ, ປອດໄພ, ໝັ້ນຄົງ ໃຫ້ພໍ່ແມ່ພີ່ນ້ອງປະຊາຊົນ.”

             ການເຊັນສັນຍາໃຫ້ການອຸປະຖໍາຢ່າງເປັນທາງການຄັ້ງນີ້ ແມ່ນ ທະນາຄານ ເອັສທີ (ST Bank) ແລະ ບໍລິສັດ ເອັສທີ ກຣຸບ (ST Group) ຈໍາກັດຜູ້ດຽວ ໃຫ້ການອຸປະຖໍາ ສຕລ ເປັນມູນຄ່າ 2,000,000,000 ກີບ ເພື່ອໃຊ້ເຂົ້າໃນການຈັດການແຂ່ງຂັນກິລາບານເຕະຊີຂັນ ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ເປັນໄລຍະເວລາ 2 ລະດູການ ກໍ່ຄື ລະຫວ່າງປີ 2025 ຫາ 2027.

ໃນວາລະໂອກາດນີ້, ທ່ານ ວີເພັດ ໄດ້ແຈ້ງໃຫ້ສື່ມວນຊົນ ຮັບຊາບຢ່າງເປັນທາງການວ່າ: “ສືບເນື່ອງຈາກການເຂົ້າມາສະໜັບສະໜູນການແຂ່ງຂັນຂອງ ທະນາຄານ ເອັສທີ ແລະ ບໍລິສັດ ເອັສທີ ກຣຸບ, ເຮັດໃຫ້ທາງ ສຕລ ປັບເພີ່ມເງິນລາງວັນຊະນະເລີດ ຈາກຈໍານວນ 200,000,000 ກີບ ໃນລະດູການ 2024/25 ມາເປັນ 300,000,000 ກີບ ໃນລະດູການນີ້, ສ່ວນຮອງຊະນະເລີດ ຈາກ 50,000,000 ກີບ ມາເປັນ 100,000,000 ກີບ.”

ການແຂ່ງຂັນກິລາບານເຕະ ຊີງຂັນ ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ປະຈຳປີ 2025/26 ໄດ້ຈັດຂຶ້ນ ລະຫວ່າງ ວັນທີ 22 ທັນວາ 2025 ຫາ 17 ມັງກອນ ປີ 2026. ເຊິ່ງໃນປີນີ້ ປະກອບມີ 19 ສະໂມສອນເຂົ້າຮ່ວມການແຂ່ງຂັນ, ໂດຍປະກອບມີ 9 ສະໂມສອນຈາກ ລາວລີກ 1 ແລະ 10 ສະໂມສອນຈາກ ລີກ 2.

              ປັດຈຸບັນ, ການແຂ່ງຂັນກໍ່ໄດ້ມາຮອດໂຄ້ງສຸດທ້າຍ ເຊິ່ງນັດຊີງຊະນະເລີດ ຈະໄດ້ຈັດຂຶ້ນທີ່ ນະຄອນ ຫຼວງພະບາງ ວັນທີ 17 ມັງກອນ 2026 ເວລາ 14:00 ໂມງ ທີ່ສະຫນາມກິລາແຂວງ, ໂດຍການພົບກັນລະຫວ່າງ ສະໂມສອນບານເຕະກອງທັບ ພົບກັບ ສະໂມສອນ ເອສະຣາ (ແຊ້ມເກົ່າປີກາຍ) ແອັດມິນຂໍເຊີນຊວນແຟນບານຊາວຫຼວງພະບາງອອກມາຊົມມາເຊຍນັກກິລາທັງສອງທີມ ແລ້ວມາລຸ້ນວ່າໃຜຈະໄດ້ແຊ້ມຂັນນາຍົກໃນປີນີ້ໄປພ້ອມໆກັນ.

Request for Proposals

External Audit for the Lao Football Federation (LFF) Financial Statements for the Year 2025

1. Title

Recruitment of External Auditor for the Audit of Lao Football Federation (LFF) Financial Statements for the Year Ended 31 December 2025.

2. Background

The Lao Football Federation (LFF) is the national governing body responsible for promoting, regulating, and developing football in Lao PDR. LFF receives financial support from various sources, including the Fédération Internationale de Football Association (FIFA), the Asian Football Confederation (AFC), the ASEAN Football Federation (AFF), sponsors, and domestic revenue.

To ensure transparency, accountability, and good governance in financial management, LFF requires the services of an independent and qualified external auditor to perform an audit of its financial statements for the fiscal year ending 31 December 2025.

The audit will cover all funds and activities managed by LFF during the year, including FIFA Forward Program funds, AFC development funds, sponsorships, and domestic operations.

3. Objective of the Assignment

The objective of this audit is to enable the auditor to express a professional and independent opinion on whether:

- The LFF’s financial statements for the year ended 31 December 2025 present fairly, in all material respects, the financial position and results of operations in accordance with applicable accounting standards; and

- The funds received have been used in accordance with the purposes intended, with due regard to principles of economy, efficiency, and effectiveness.

4. Scope of Work

The audit will be conducted in accordance with International Standards on Auditing (ISA) and will include such tests and procedures as the auditor considers necessary to form an opinion. Specifically, the auditor shall:

1. Verify that all revenues and expenditures have been properly recorded, classified, and disclosed in accordance with applicable accounting standards and LFF policies.

2. Confirm that funds received from FIFA, AFC, sponsors, and other sources have been used only for their intended purposes.

3. Review the internal control systems to determine whether adequate safeguards are in place to protect assets and prevent fraud or misuse of funds.

4. Examine procurement and payment procedures to ensure compliance with relevant financial and procurement regulations.

5. Review the bank accounts, reconciliation statements, and cash management systems.

6. Assess compliance with donor and partner requirements.

7. Identify any weaknesses in financial management and make recommendations for improvement.

5. Deliverables

The auditor shall provide:

1. Audit Report and Opinion: Expressing a clear opinion on the financial statements and use of funds.

2. Management Letter: Outlining any internal control weaknesses, non-compliance issues, and recommendations for improvement.

6. Reporting and Timeline

The audit shall cover the financial year from 1 January 2025 to 31 December 2025. The auditor will begin fieldwork no later than April 2026 and submit the final Audit Report and Management Letter to LFF management no later than 31 May 2026. Reports must be submitted in English.

7. Qualification Requirements

The external auditor (firm) must:

- Be a legally registered and independent audit firm in Lao PDR.

- Be a member of the Lao Chamber of Professional Accountants and Auditors (LCPAA).

- Have at least three (3) years of experience in auditing NGOs, sports federations, or international donor-funded organizations.

- Ensure that the audit team includes qualified professionals with CPA or equivalent credentials.

8. Submission of Proposals and Required Documentation

Interested and qualified firms should submit a technical and financial proposal that includes the following documents:

- Company profile with description of services, key clients, and past experience in external audit.

- Latest company registration certificate.

- Valid business license.

- Sector-specific license for audit or professional services.

- Latest tax payment certificate.

- Description of the proposed audit methodology.

- CVs of key staff.

- Proposed work plan and timeline.

- Financial proposal (audit fee and other costs).

Kindly submit the set of required documents listed above to email: contact@laoff.org.la no later than 9 January 2026

9. Payment Terms

The audit fee and payment schedule will be agreed upon between LFF and the selected audit firm prior to contract signing.

        ວັນທີ 23 ທັນວາ 2025 ຜ່ານມາ ສະຫະພັນບານເຕະນາໆຊາດ(FIFA) ໄດ້ສົ່ງຫນັງສືເຖິງ ສະຫະພັນບານ ເຕະແຫ່ງຊາດລາວ (ສຕລ) ເພື່ອແຈ້ງຂ່າວດີໃຫ້ຊາບວ່າ: ທ່ານ ວົງມີໄຊ ສຸບົວຄຳ ຜູ້ຝຶກສອນຫຼັກຈາກ ສປປ ລາວ ແລະ ທ່ານ ເຮີມັນ (Herman Zalaini) ຫົວຫນ້າພັດທະນາຄູຝຶກ ສຕລ ໄດ້ສອບເສັງຜ່ານເປັນຜູ້ຝຶກສອນຄູຝຶກຂອງ FIFA (FIFA Coach Educator Diploma) ໂດຍທັງສອງທ່ານໄດ້ເຂົ້າອົບຮົມສຶກສາຮໍ່າຮຽນນັບຕັ້ງແຕ່ ເດືອນ ຕຸລາ ປີ 2023 ຫາ ເດືອນ ຕຸລາ ປີ 2025 ລວມໄລຍະເວລາຮຽນ 2 ປີ ເຕັມ ໂດຍແບ່ງອອກເປັນ 6 ໄລຍະ ເຊິ່ງພວກຜູ້ກ່ຽວໄດ້ລົງເລີກສຶກສາທາງດ້ານທິດສະດີ, ເລື່ອງການພັດທະນາທັກສະ ແລະ ການປະຕິບັດຕົວຈີງ ເພື່ອກ້າວໄປສູ່ເປັນຄູຝຶກສອນຄູຝຶກ ແລະ ພັດທະນາຄູຝຶກລຸ້ນຕໍ່ໆໄປ.

       ຜົນສຳເລັດຂອງບຸກຄະລາກອນ ສຕລ ທັງ 2 ທ່ານ ໃນຄັ້ງນີ້ ຖືເປັນບາດກ້າວໜຶ່ງທີ່ສຳຄັນໃນການພັດທະນາ ຜູ້ຝຶກສອນຄູຝຶກຂອງ ສປປ ລາວ ເວົ້າລວມ, ກໍຄືຂອງ ສຕລ ເວົ້າສະເພາະ, ຕະຫຼອດໄລຍະທີ່ຜ່ານມາ, ຄະນະບໍລິຫານ ງານຂອງ ສຕລ ຍາມໃດກໍຍຶດໝັ້ນເອົາການພັດທະນາບຸກຄະລາກອນພາຍໃນເປັນສິ່ງສຳຄັນຢ່າງຕໍ່ເນື່ອງ, ທັງໄດ້ເນັ້ນວິໄສ ທັດສົ່ງເສີມໃຫ້ບຸກຄະລາກອນຄົນລາວ ມີໂອກາດຍົກສູງລະດັບຄວາມຮູ້ຄວາມສາມາດໃນວຽກງານວິຊາສະເພາະ ຂອງຕົນ ໂດຍການສົ່ງຄູຝຶກລາວເຂົ້າຮ່ວມຮຽນ-ຝຶກອົບຮົມຫຼັກສູດຕ່າງໆ ຂອງ FIFA ແລະ AFC ຢ່າງສະໝໍ່າສະເໝີ. ນອກນັ້ນ, ຍັງໄດ້ສົ່ງເສີມໃຫ້ຄູຝຶກລາວ ມີໂອກາດພູດສູດ, ພັດທະນາຂີດຄວາມສາມາດ ໃຫ້ກາຍເປັນຜູ້ຝຶກສອນຄູຝຶກບານເຕະລະດັບ C, B, A ຂອງ AFC ຕາມລໍາດັບ.

        ນັບແຕ່ປີ 2023 ເປັນຕົ້ນມາ ສຕລ ສາມາດເປີດຫຼັກສູດຝຶກອົບຮົມຄູຝຶກບານເຕະ ລະດັບ AFC B ແລະ C ໄດ້ໂດຍບໍ່ຕ້ອງເຊີນຄູຝຶກຊາວຕ່າງຊາດມາເປັນຜູ້ຝຶກສອນ ແລະ ເປັນການຕ້ອນຮັບປີໃໝ່, ໃນປີ 2026 ເປັນຕົ້ນໄປ ສຕລ ກະກຽມເປີດຫຼັກສູດຝຶກອົບຮົມຄູຝຶກ ລະດັບ A ໂດຍແມ່ນຄົນລາວເປັນຜູ້ຝຶກສອນ.

ສະຫະພັນບານເຕະແຫ່ງຊາດລາວ (ສຕລ) ໄດ້ຈັດພິທີເຜີຍແຜ່ຜົນຮ້າຍ ແລະ ໂທດຂອງການລົ້ມບານ ເພື່ອຕ້ານ ແລະ ສະກັດກັ້ນ ທຸກພຶດຕິກຳທີ່ເປັນການທໍາລາຍກຽດສັກສີຊື່ສຽງຂອງ ວົງການບານເຕະລາວ, ຊຶ່ງການເຜີຍແຜ່ນີ້ໄດ້ຈັດຂຶ້ນໃນຕອນເຊົ້າຂອງວັນທີ 25 ທັນວາ 2025 ທີ່ ພະແນກ ສຶກສາທິການ ແລະ ກິລ າແຂວງ ສະຫວັນນະເຂດ, ເພື່ອກຽມຄວາມພ້ອມໃຫ້ແກ່ການແຂ່ງຂັນບານເຕະຊີງຂັນ ພະນະທ່ານນາຍົກ ລັດຖະມົນຕີ ແຫ່ງ ສປປ ລາວ ລະດູການ 2025/26, ຮອບຄັດເລືອກກຸ່ມA, ຊຶ່ງເປັນການແຂ່ງຂັນຮອບຄັດເລືອກຂອງທີມສະໂມສອນ ລາວລີກ 2 ທີ່ຈະຈັດຂຶ້ນທີ່ ແຂວງ ສະຫວັນນະເຂດ ລະຫວ່າງວັນທີ 26-30 ທັນວາ 2025.

       ການເຜີຍແຜ່ ແລະ ບັນລະຍາຍໂດຍ ທ່ານ ອາລິດສະມັນ ພົມມະຈັນ, ຜູ້ຮັບຜິດຊອບວຽກງານຕໍ່ຕ້ານການລົ້ມບານ (Integrity Officer) ຂອງ ສຕລ ໄດ້ຍົກໃຫ້ເຫັນເຖິງຜົນຮ້າຍ ແລະ ບົດລົງໂທດຂອງການລົ້ມບານທີ່ຈະສົ່ງຜົນເສຍຕໍ່ອະນາຄົດຂອງນັກກິລາເວົ້າສະເພາະ ແລະ ມີຜົນເສຍເຖິງກຽດ ແລະ ສັກສີຢ່າງຫຼວງຫຼາຍຕໍ່ສັງຄົມ ແລະ ປະເທດຊາດ ກໍຄືວົງການບານເຕະລາວເວົ້າລວມ.

ນອກຈາກນັ້ນ, ຍັງໄດ້ມີການແນະນໍາວິທີການຮັບມືຕອບໂຕ້ ຫຼື ປະຕິເສດເມື່ອຖືກຊັກຊວນໃຫ້ລົ້ມບານ ແລະ ວິທີການລາຍງານທັນທີໃຫ້ແກ່ໜ່ວຍງານຮັບຜິດຊອບຕໍ່ຕ້ານການລົ້ມບານຂອງ ສຕລ ເພື່ອດໍາເນີນການຕ້ານ ແລະ ສະກັດກັ້ນໃຫ້ທັນການ ແລະ ສຕລ ຍາມໃດກໍໃຫ້ການປົກປ້ອງນັກກິລາທີ່ເປັນຜູ້ບໍລິສຸດຢ່າງຍຸຕິທຳ.

ສໍາລັບການເຂົ້າຮ່ວມຮັບຟັງຄັ້ງນີ້ ໄດ້ມີຄະນະຄູຝຶກ ແລະ ນັກກິລາຈາກ 4 ສະໂມສອນຄືສະໂມສອນ ທະຫານ ແຂວງ ສະຫວັນນະເຂດ, ສະໂມສອນບານເຕະ ປກສ ແຂວງ ເຊກອງ, ສະໂມສອນບານເຕະ ປກສ ແຂວງ ບໍ່ແກ້ວ ແລະ ສະໂມສອນບານເຕະ ໂຮງງານອາລູຊີ້ງ ທີພີທີ ເຊິ່ງລວມທັງໝົດຫຼາຍກວ່າ 100 ຄົນທີ່ໄດ້ເຂົ້າຮ່ວມ.

         ການຝຶກອົບຮົມຍົກລະດັບຄວາມສາມາດໃຫ້ແກ່ວິຊາການບໍລິຫານບານເຕະຍິງ (FIFA Capacity-Building for Administrators) ໄດ້ສິ້ນສຸດລົງດ້ວຍຜົນສໍາເລັດອັນຈົບງາມໃນວັນທີ 22 ທັນວາ. ພາຍຫຼັງດໍາເນີນມາເປັນເວລາ 3 ມື້ເຕັມ (ລະຫວ່າງ 20 - 22 ທັນວາ 2025), ໃຫ້ກຽດເຂົ້າຮ່ວມປິດພິທີໂດຍ ທ່ານ ນາງ ກັນຍາ ແກ້ວມະນີ, ຮອງປະທານ ສະຫະພັນບານເຕະແຫ່ງຊາດລາວ (ສຕລ), ວິທະຍາກອນຮັບເຊີນຈາກ ສະຫະພັນບານເຕະນາໆຊາດ (FIFA), ຜູ້ຕາງໜ້າຈາກສະຫະພັນບານເຕະທັງ 18 ແຂວງລວມນະຄອນຫຼວງວຽງຈັນ, ສະໂມສອນກິລາບານເຕະລາວລີກ 1, ລາວລີກຍິງ, ຕົວແທນຈາກພາກລັດໄດ້ແກ່ ກະຊວງສຶກສາທິການ ແລະ ກິລາ, ສະຫະພັນແມ່ຍິງສູນກາງ, ສື່ມ່ວນຊົນ-ໜັງສືພິມ, ພ້ອມດ້ວຍພະນັກງານວິຊາການຂອງ ສຕລ ທີ່ໄດ້ເຂົ້າຮ່ວມຝຶກອົບຮົມໃນຄັ້ງນີ້.

         ໃນວາລະປີດພິທີ ທ່ານ ນາງ ກັນຍາ ແກ້ວມະນີ ໄດ້ກ່າວວ່າ: “ການຝຶກອົບຮົມຄັ້ງນີ້ເຖິງຈະມີໄລຍະເວລາສັ້ນພຽງແຕ່ 3 ວັນ, ແຕ່ຜູ້ເຂົ້າຮ່ວມກໍໄດ້ຮຽນຮູ້ຫຼາຍຫົວຂໍ້ສຳຄັນທີ່ປິ້ນອ້ອມກ່ຽວກັບບໍລິຫານຈັດການກິລາບານເຕະເຊັ່ນ: ໂຄງຮ່າງການຈັດຕັ້ງຂອງ FIFA, AFC ແລະ ສຕລ; ໂຄງການພັດທະນາບານເຕະຍິງຂອງ FIFA, ແຜນຍຸດທະສາດພັດທະນາບານເຕະຍິງຂອງ ສຕລ, ວຽກງານການຕະຫຼາດ, ການລະດົມທຶນ ແລະ ກິດຈະກໍາທີ່ຊ່ວຍດຶງດູດ ແລະ ການມີສ່ວນຮ່ວມກັບແຟນບານ, ການບໍລິຫານການເງິນ, ບໍລິຫານສະໂມສອນ, ການເປັນຜູ້ນໍາ ແລະ ການສື່ສານ, ການປ້ອງກັນ-ປົກປ້ອງນັກກີລາ ແລະ ຄວາມຮັບຜິດຊອບຕໍ່ສັງຄົມ, ບົດບາດເພດຍິງໃນວົງການກິລາລາວ ແລະ ອື່ນໆ. ຫວັງວ່າບັນດາທ່ານທີ່ເຂົ້າຮ່ວມງານຝຶກອົບຮົມຄັ້ງນີ້, ຈະໄດ້ຮັບແຮງບັນດານໃຈ ແລະ ນໍາເອົາຄວາມຮູ້ທີ່ໄດ້ຮຽນໄປໝູນໃຊ້ໃຫ້ເກີດໝາກຜົນຕົວຈິງໃນຂົງເຂດໜ້າທີ່ຮັບຜິດຊອບ ພ້ອມທັງໄປພັດທະນາອົງກອນທີ່ຕົນເອງສັງກັດ. ເພາະການພັດທະນາບານເຕະ ຍິງ-ຊາຍ ບໍ່ແມ່ນໜ້າທີ່ ສຕລ ຝ່າຍດຽວ ແຕ່ເປັນຂອງມ່ວນຊົນທຸກຄົນ ທີ່ຕ້ອງໄດ້ມີສ່ວນຮ່ວມຊຸກຍູ້ຊ່ວຍເຫຼືອເຊິ່ງກັນແລະກັນ ເພື່ອໃຫ້ເກີດໝາກຜົນເປັນຮູບປະທຳ, ສຕລ ຈະບໍ່ເຄື່ອນໄຫວໄດ້ເຕັມກຳລັງ ຖ້າບໍ່ມີ ສຕຂ ແລະ ບັນດາສະໂມສອນບານເຕະ ທີ່ຊ່ວຍກັນພັດທະນາບານເຕະໃນຂັ້ນທ້ອງຖິ່ນ.”

          ນອກນັ້ນ, ຜູ້ເຂົ້າຮ່ວມຍັງໄດ້ຮ່ວມຮັບຟັງການສົນທະນາແລກປ່ຽນຄວາມຄິດເຫັນ, ບົດຮຽນ ແລະ ປະສົບການຕົວຈີງຈາກແຂກຮັບເຊີນຈາກຫຼາຍພາກສ່ວນເຊັນ: ອະດີດນັກກິລາທີມຊາດທີີ່ປັດຈຸບັນເປັນອາຈານສອນຢູ່ມະຫາວິທະຍາໄຊແຫ່ງຊາດ, ນັກກິລາທີມຊາດ, ຄູຝຶກບານເຕະ, ຜູ້ໃຫ້ການສະໜັບສະໜູນ ແລະ ສະຫະພັນແມ່ຍິງສູນກາງ ເພື່ອເປັນຂໍ້ຄິດ, ແຮງບັນດານໃຈ ແລະ ນຳໄປດັດປັບໃຫ້ເຂົ້າກັບໜ້າວຽກທີ່ຕົນເອງຮັບຜິດຊອບ ພ້ອມຍົກລະດັບຄວາມສາມາດໄປພ້ອມໆກັນ.

 ວັນທີ 20 ທັນວາ 2025 ຢູ່ທີ່ຫ້ອງປະຊຸມໂຮງແຮມ ແລນມາກ ນະຄອນຫຼວງວຽງຈັນ, ສະຫະພັນບານເຕະແຫ່ງຊາດລາວ (ສຕລ) ໄດ້ຈັດຝຶກອົບຮົມ ການຍົກລະດັບຄວາມສາມາດໃຫ້ແກ່ວິຊາການບໍລິຫານບານເຕະຍິງ “FIFA Capacity Building for Administrator” ໃຫ້ກຽດເຂົ້າຮ່ວມເປີດງານໂດຍ ທ່ານ ນ. ກັນຍາ ແກ້ວມະນີ ຮອງປະທານ ສະຫະພັນບານເຕະແຫ່ງຊາດລາວ ທັງເປັນ ຫົວໜ້າອະນຸກຳມະການບານເຕະຍິງ ສະຫະພັນບານເຕະແຫ່ງຊາດລາວ, ພ້ອມດ້ວຍຊ່ຽວຊານຈາກ ສະຫະພັນບານເຕະນາໆຊາດ (FIFA) ຈຳນວນ 2 ທ່ານ, ທ່ານ ນ. NATACHA TARATEERASARN ແລະ ທ່ານ ນ. PEMA CHODEN TSHERING, ພ້ອມດ້ວຍຄະນະບໍລິຫານງານ ສຕລ, ຜູ້ແທນຈາກບັນດາສະຫະພັນບານເຕະແຂວງ, ນະຄອນຫຼວງ, ຜູ້ຕາງໜ້າຈາກສະໂມສອນກິລາບານເຕະລາວລີກ 1, ສະໂມສອນກິລາບານເຕະ ລາວລີກຍິິງ, ບັນດາສື່ມວນຊົນ ພ້ອມດ້ວຍອ້າຍນ້ອງວິຊາການ ສຕລ.

ກ່າວເປີດກອງປະຊຸມຢ່າງເປັນທາງການໂດຍ ທ່ານ ນ. ກັນຍາ ແກ້ວມະນີ ຮອງປະທານສະຫະພັນບານເຕະແຫ່ງຊາດລາວ ເຊິ່ງໄດ້ກ່າວວ່າ: “ການຈັດຝຶກອົບຮົມ ການຍົກລະດັບຄວາມສາມາດໃຫ້ແກ່ວິຊາການບໍລິຫານບານເຕະຍິງ ແມ່ນເປັນຄັ້ງທຳອິດທີ່ໄດ້ຈັດຝຶກອົບຮົມ ຢູ່ໃນ ສປປ ລາວ ເນື່ອງຈາກພວກເຮົາ ກໍຄື ຄະນະບໍລິຫານງານ ສຕລ ເລັງເຫັນຄວາມສຳຄັນວ່າ ໜຶ່ງໃນໝາກຫົວໃຈຂອງການພັດທະນາກິລາບານເຕະຍິງ ບໍ່ວ່າຈະເປັນລະດັບທ້ອງຖິ່ນ, ລະດັບຊາດ ຕະຫຼອດຮອດລະດັບນາໆຊາດ, ບັນດາວິຊາການບໍລິຫານ ແມ່ນມີພາລະບົດບາດສຳຄັນວ່າຈະເຮັດໜ້າທີ່ພົວພັນປະສານງານ, ວາງແຜນການບໍລິຫານ, ຕິດຕາມການຈັດຕັ້ງປະຕິບັດ ແຜນຍຸດທະສາດຕ່າງໆທີ່ປິ່ນອ້ອມ ເປັນທັງຂົວຕໍ່ການພົວພັນລະຫວ່າງ ຄະນະບໍລິຫານງານ, ໄປຈົນເຖິງວິຊາການເຕັກນິກພາກສະຫນາມ, ຕະຫຼອດຮອດບັນດານັກກິລາ, ດັ່ງນັ້ນ, ຖ້າຕ້ອງການໃນໂຄງສ້າງຂອງອົງກອນ ຫຼື ສະຫະພັນບານເຕະມີຄວາມເຂັ້ມແຂງ ພວກເຮົາຕ້ອງໄດ້ສ້າງລະບົບການບໍລິຫານພາຍໃນໃຫ້ມີຄວາມເຂັ້ມແຂງ ເຊິ່ງກໍ່ໝາຍເຖິງທຸກໆທ່ານທີ່ເຂົ້າຮ່ວມໃນການຝຶກອົມຮົມໃນຄັ້ງນີ້ ທີ່ເປັນອົງປະກອບທີ່ສຳຄັນທີ່ຈະນຳພາໃຫ້ອົງກອນ ຫລື ສະຫະພັນກິລາຂອງພວກທ່ານ ໃຫ້ມີພື້ນຖານການພັດທະນາແບບຍືນຍົງ”

ການຝຶກອົບຮົມຄັ້ງນີ້ ແມ່ນໄດ້ຈັດຂຶ້ນໃນລະຫວ່າງວັນທີ 20-22 ທັນວາ 2025, ໃນໄລຍະເວລາ 3 ວັນ ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບ ໂຄງຮ່າງການຈັດຕັ້ງຂອງ ສະຫະພັນບານເຕະນາໆຊາດ (FIFA), ສະຫະພັນບານເຕະອາຊີ (AFC) ແລະ ສະຫະພັນບານເຕະແຫ່ງຊາດລາວ (ສຕລ), ໂຄງການພັດທະນາບານເຕະບານເຕະຍິງຂອງ FIFA, ແຜນຍຸດທະສາດພັດທະນາບານເຕະຍິງ ສຕລ ສົກປີ 2023 – 2027, ວຽກງານການຕະຫຼາດ, ການລະດົມທຶນ ແລະ ກິດຈະກຳທີ່ຊ່ວຍດຶງດູດມວນຊົນ ແລະ ການມີສ່ວນຮ່ວມກັບແຟນບານ, ການບໍລິຫານວຽກງານການເງິນ, ການບໍລິຫານສະໂມສອນບານເຕະໃນລາວ, ການເປັນຜູ້ນໍາ, ການສື່ສານ, ການປ້ອງກັນ ແລະ ປົກປ້ອງນັກກິລາ ແລະ ຄວາມຮັບຜິດຊອບຕໍ່ສັງຄົມ, ການອອກໃບອະນຸຍາດສະໂມສອນ “Club Licensing”, ນອກຈາກນັ້ນແລ້ວຜູ້ເຂົ້າຮ່ວມຍັງໄດ້ຮ່ວມສົນທະນາ ເພື່ອແລກປ່ຽນຄວາມຄິດເຫັນ, ບົດຮຽນ ແລະ ປະສົບການຕົວຈີງ ເພື່ອຈະໄດ້ນຳໄປດັດປັບໃຫ້ເຂົ້າກັບໜ້າວຽກທີ່ຕົນເອງຮັບຜິດຊອບ ແລະ ຍົກລະດັບຄວາມສາມາດໄປພ້ອມໆກັນ. 

         ລະຫວ່າງວັນທີ 01-12 ທັນວາ 2025 ຜູ້ເຂົ້າຮ່ວມ ຝຶກອົບຮົມຄູຝຶກລະດັບ ໂປຣລາຍເຊັນ “LFF/AFC – Pro Diploma Coaching Course” ໄດ້ໄປທັດສະນະສຶກສາ ຢູ່ທີ່ປະເທດ ກາຕ້າ ແລະ ຊາອຸດິດ ອາຣັບບີ.

        ຈຸດປະສົງຂອງການເດີນທາງໄປທັດສະນະສຶກສາໃນຄັ້ງນີ້ ແມ່ນໜຶ່ງໃນຫຼັກສູດການຝຶກອົບຮົມຄູຝຶກລະດັບສູງສຸດ (Pro License) ເພື່ອສຶກສາຮູບແບບການບໍລິຫານກິລາສະໄໝໃໝ່, ການພັດທະນາບານເຕະຍິງ ແລະ ກິລາອາຊີບ, ການສ້າງມູນເຊື້ອສືບທອດພາຍຫຼັງສິ້ນສຸດຈາກການເປັນເຈົ້າພາບຈັດການແຂ່ງຂັນບານເຕະໂລກ ແລະ ລະບົບການພັດທະນາສັກກະຍາພາບບຸກຄະລາກອນ (Talent Development) ທີ່ຖືກນໍາໃຊ້ໃນປະເທດຕາເວັນອອກກາງ.

          ໃນການທັດສະນະສຶກສາຄັ້ງນີ້, ທາງຄະນະໄດ້ມີໂອກາດເຂົ້າຮ່ວມສັງເກດການແຂ່ງຂັນບານເຕະຍິງ (Saudi Women’s Premier League) ແລະ ການແຂ່ງຂັນ ລີກ 3 (Saudi Third Division) ທີ່ ເມືອງ Dammam ປະເທດ ຊາອຸດິດ ອາຣັບບີ, ການແຂ່ງຂັນບານເຕະ FIFA Arab Cup Qatar 2025, FIFA Intercontinental Cup Qatar 2025 and the U23 Gulf Cup Qatar 2025 ທີ່ ເມືອງ Doha ປະເທດ ກາຕ້າ

           ນີ້ເປັນຄັ້ງທໍາອິດໃນປະຫວັດສາດຂອງ ສປປ ລາວ ແລະ ຂອງ ສຕລ ທີ່ໄດ້ຈັດການຝຶກອົບຮົມຄູຝຶກລະດັບສູງສຸດ (Pro License) ເຊິ່ງປະກອບມີ 8 ຫຼັັກສູດ ໂດຍໃຊ້ເວລາໃນການຝຶກອົບຮົມ ລວມທັງຫມົດ 9 ເດືອນ, ເຊິ່ງໄດ້ເລີ້ມແຕ່ ວັນທີ 14 ກໍລະກົດ 2025 ແລະ ຈະສິ້ນສຸດໃນ ວັນທີ 21 ເມສາ ປີ 2026. ແຕ່ລະຫຼັກສູດໄດ້ມີການເຊີນຊ່ຽວຊານຕ່າງປະເທດທີ່ຮັບການຮັບຮອງຈາກ FIFA/AFC ມາເປັນຜູ້ບັນລະຍາຍ ແລະ ສິດສອນ. ພາຍຫຼັງຝຶກອົບຮົມຄົບ, ຜູ້ເຂົ້າຮ່ວມຄູຝຶກຕ້ອງໄດ້ເຮັດບົດວິພາກ ແລະ ສອບເສັງກ່ອນຈະໄດ້ຮັບໃບປະກາດ.

ການຝຶກອົບຮົມ ຫຼັກສູດ “ຄູຝຶກບານເຕະ ລະດັບ Pro License” ຄັ້ງນີ້ ແມ່ນໄດ້ຮັບການຮັບຮອງຈາກ ສະຫະພັນບານເຕະອາຊີ (AFC) ໂດຍມີຜູ້ເຂົ້າຮ່ວມທັງໝົດ 12 ທ່ານ ທີ່ມາຈາກບັນດາ ສະໂມສອນບານເຕະພາຍໃນປະເທດລາວ ຈໍານວນ 6 ທ່ານ ໃນນັ້ນມີ ຍິງ 1 ທ່ານ ແລະ ຕ່າງປະເທດ ຈໍານວນ 6 ທ່ານ ເຊິ່ງມາຈາກປະເທດ ສິງກະໂປ, ມາເລເຊຍ, ໄທ, ກຳປູເຈຍ ແລະ ຍີ່ປຸ່ນ.

            ການຈັດຝຶກອົບຮົມນີ້, ກໍເປັນຫນຶ່ງໃນແຜນຍຸດທະສາດຂອງ ສຕລ ເພື່ອຍົກລະດັບບຸກຄະລາກອນຂອງລາວໃຫ້ໄດ້ມາດຕະຖານສາກົນ ແລະ ເພື່ອຮອງຮັບແຜນການເຄື່ອນໄຫວຂອງທີມຊາດລາວໃນອານາຄົດ, ເຊິ່ງທາງ ສຕລ ກໍຄາດຫວັງໄວ້ວ່າ ເລີ້ມແຕ່ກາງປີ 2026 ທີມຊາດທຸກລຸ້ນຈະມີຄູຝຶກຄົນລາວເປັນຫົວໜ້າຄູຝຶກ.

      ສະຫະພັນບານເຕະແຫ່ງຊາດລາວ( ສຕລ) ໄດ້ສຳເລັດການຝຶກອົບຮົມຄູຝຶກສອນກິລາຟຸດຊໍ ລະດັບ 2 ( AFC FUTSAL LEVEL 2 COACHING CERTIFICATE COUSE ) ເມື່ອວັນທີ 04 ທັນວາ 2025 ທີ່ຫ້ອງປະຊຸມ ສຕລ,ໃຫ້ກຽດເຂົ້າຮ່ວມພິທີປິດໂດຍ ທ່ານ ປອ ບຸນຍູ້ ສີສານ ຄະນະບໍລິຫານງານ ສຕລ, Mr.Hussein Dip ຜູ້ຝຶກສອນກິລາຟຸດຊໍ ຈາກ AFC ພ້ອມດ້ວຍພະນັກງານວິຊາການກ່ຽວຂ້ອງ ແລະ ນັກສຳມະກອນຈໍານວນ 09 ທ່ານ ຈາກບັນດາສະໂມສອນ ລາວ ຟຸດຊໍລີກ, ຈາກປະເທດໄທ 02 ທ່ານ.

       ໃນໂອກາດດັ່ງກ່າວ ທ່ານ ປອ ບຸນຍູ້ ສີສານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງການຝຶກອົບຮົມຄັ້ງນີ້, ປີນີ້ແມ່ນມີຄວາມໝາຍສໍາຄັນທາງປະຫວັດສາດ ໃນການສະຖາປະນາ ສປປ ລາວ ຄົບຮອບ 50 ປີ, ໃນໂອກາດດັ່ງກ່າວນີ້ ຮຽກຮ້ອງໃຫ້ຜູ້ເຂົ້າຮວ່ມຈົ່ງນຳໃຊ້ບົດຮຽນທີ່ໄດ້ຮຽນມາໄປພັດທະນານຳໃຊ້ແລະຮຽນຮູ້ແລກປ່ຽນບົດຮຽນ, ປະສົບການນຳກັນ ໃນການເອົາໄປນໍາໃຊ້ໃຫ້ເກີດປະໂຫຍດຫຼາຍເທົ່າທີ່ຈະຫຼາຍໄດ້ ເພື່ອພ້ອມກັນພັດທະນາວົງການກິລາຟຸດຊໍລາວໃຫ້ດີຂື້ນໄປເລື້ອຍໆ ໃນລະດັບຕໍ່ໆໄປ.

       ຕະຫຼອດໄລຍະການຝຶກອົບຮົມໃນຄັ້ງນີ້ ໄດ້ຮຽນຮູ້ທັງພາກທິດສະດີ ແລະ ການປະຕິບັດຕົວຈິງຢູ່ສະໜາມ, ໂດຍມີການສອບເສັງ 03 ຄັ້ງ ( ພາກຕົວຈິງ 02 ຄັ້ງ ແລະ ພາກທິດສະດີ 1 ຄັ້ງ ),ໃນນັ້ນ ພາກທິດສະດີແມ່ນໄດ້ຮຽນຮູ້ກ່ຽວກັບ ຄວາມຕ້ອງການເພື່ອເປັນຄູຝຶກປະສົບຜົນສໍາເລັດ, ການຝຶກແອບໜ້າທີ່ຂອງໜ້າເປົ້າ, ຍຸດທະວິທີການບຸກ, ລະບົບການປ້ອງກັນ, ການວິເຄາະເກມ, ພະລະກໍາລັງ ແລະ ການຟື້ນຄືນຂອງນັກກິລາ, ການປ້ອງກັນການບາດເຈັບ, ການກະກຽມທີມກ່ອນລະດູການແຂ່ງຂັນ ແລະ ການກະກຽມອາທິດກ່ອນເກມແຂ່ງຂັນ, ການປ່ຽນຈາກບຸກມາເປັນຮັບ ແລະ ຈາກຮັບເປັນບຸກ, ການໂຕ້ກັບໄວ, ລູກຕັ້ງເຕະ. ສ່ວນພາກຕົວຈິງໄດ້ຮຽນຮູ້ກ່ຽວກັບ ຝຶກໜ້າທີຂອງໜ້າເປົ້າ ເກມເດີ່ນນ້ອຍ, ຝຶກການຫຼີ້ນດ້ານຍຸດທະວີທີ(ການເຄື່ອນທີ່,ການສະກັດບານ), ລະບົບການບຸກ(3-1,2-2,4-0), ລະບົບການປ້ອງກັນຮູບແບບການປ້ອງກັນ, ການປ່ຽນຈາກບຸກມາເປັນຮັບ(ການເຄື່ອນທີ່) ແລະ ອື່ນໆ.

         ສຳລັບການຝຶກອົບຮົມແມ່ນໄດ້ດຳເນີນໄປເປັນເວລາ 9 ວັນ ແຕ່ວັນທີ 26 ພະຈິກ – 04 ທັນວາ 2025. ໃນຕອນທ້າຍພິທີຍັງມີການມອບໃບຢັ້ງຢືນໃຫ້ກັບຜູ້ເຂົ້າຮ່ວມຝຶກອົບຮົມ ທັງ 09 ທ່ານ .ສ່ວນຜົນການຝຶກອົບຮົມຄູຝຶກສອນກິລາຟຸດຊໍ ລະດັບ 2 ແມ່ນຈະແຈ້ງໃຫ້ສໍາມະນາກອນຮັບຊາບຕາມພາຍຫຼັງ.

           ທີມຊາດລາວ ຊຸດໃຫຍ່ ພາຍໃຕ້ການຄຸມທີມຂອງ ທ່ານ ຮາ ຮອກ ຈູນ (HA HYEOKJUN) ຄູຝຶກ ທີມຊາດລາວ ສັນຊາດ ສ.ເກົາຫລີ ໄດ້ປະກາດລາຍຊື່ນັກກິລາ 23 ຄົນ ເຂົ້າຮ່ວມ ການແຂ່ງຂັນບານເຕະ ຊີງແຊ້ມອາຊີ 2027 ຮອບຄັດເລືອກ ( ຮອບສຸດທ້າຍ ) AFC Asian Cup Saudi Arabia 2027 Qualifiers ( Final Round ) ນັດທີ 4 ເຊິ່ງຈະແຂ່ງຂັນ ວັນທີ 19 ພະຈິກ 2025 ເວລາ 19:00 ທີມຊາດລາວ ພົບ ທີມຊາດຫວຽດນາມ ແຂ່ງຂັນຢູ່ທີ່ສະຫນາມກິລາແຫ່ງຊາດຫຼັກ 16 ນັກກິລາ 23 ຄົນ ມີລາຍຊື່ດັ່ງລຸ່ມນີ໊:

+ ຜູ້ຮັກສາປະຕູ

- ກົບ ໂລກພະທິບ ຈາກ ສະໂມສອນ ເອສະຣາ

- ອານຸລັກ ວິລະຜົນ ຈາກ ສະໂມສອນ ມັດສະດ້າ ຈີບີ

- ສຸລິສັກ ສຸວັນຄຳ ຈາກ ສະໂມສອນ ນໍ້າທາ ຢູໄນເຕັດ

+ ກອງຫຼັງ

- ເພັດດາວັນ ສົມສະນິດ ຈາກ ສະໂມສອນ ເອສະຣາ

- ສະເລີມໄຊ ພົມມະວົງ ຈາກ ສະໂມສອນ ເອສະຣາ

- ພຸດທະວົງ ສັງວິໄລ ຈາກ ສະໂມສອນ ບີຈີ ປະທຸມ ຢູໄນເຕັດ ( ປະເທດໄທ )

- ໄຊຍະສິດ ສິງສະຫວ່າງ ຈາກ ສະໂມສອນ ນໍ້າທາ ຢູໄນເຕັດ

- ສອນວິໄລ ເພັດວຽງສີ ຈາກ ສະໂມສອນ ມັດສະດ້າ ຈີບີ

- ວົງສັກດາ ຈັນທະລືໄຊ ຈາກ ສະໂມສອນ ມັດສະດ້າ ຈີບີ

- ບຸນແພງ ໄຊສົມບັດ ຈາກ ສະໂມສອນ ຫຼວງພະບາງ ຟຟລ

- ເພັດວິໄຊ ພິມມະເສນ ຈາກ ສະໂມສອນ ຈຳປາສັກ ອາເວເນຍ

- ໂອຄຳ ລາດຊະຈັກ ຈາກ ສະໂມສອນ ກອງທັບ

+ ກອງກາງ

- ຈັນທະວີໄຊ ຂຸນທຸມພອນ ຈາກ ສະໂມສອນ ເອສະຣາ

- ບິນລີ້ ໂດນສະຫນູພິດ ຈາກ ສະໂມສອນ ເອສະຣາ

- ຄໍາປານ ດວງວິໄລ ຈາກ ສະໂມສອນ ສາລະວັນ ຢູໄນເຕັດ

- ສຸກພະຈັນ ເລື່ອນທະລາ ຈາກ ສະໂມສອນ ສາລະວັນ ຢູໄນເຕັດ

- ສົມຫວັງ ຈູມມະນີ ຈາກ ສະໂມສອນ ມັດສະດ້າ ຈີບີ

- ຄອນສະຫວັນ ແກ້ວຫນູຈັນ ຈາກ ສະໂມສອນ ມັດສະດ້າ ຈີບີ

- ດາຫມົດ ທອງຄໍາສະຫວັດ ຈາກ ສະໂມສອນ ແທັງຮວາ ( ປະເທດຫວຽດນາມ )

- ສາຍຝົນ ແກ້ວຫານາມ ຈາກ ສະໂມສອນ ກິລາບາເຕະ ຫົວຫີນ ມາຣາເຣຍນາ ( ປະເທດໄທ )

+ ກອງຫນ້າ

- ບຸນພະຈັນ ບຸນກອງ ຈາກ ສະໂມສອນ ສວາຍຣຽງ ( ປະເທດກໍາປູເຈຍ )

- ປີເຕີ້ ພັນທະວົງ ຈາກ ສະໂມສອນ ເອສະຣາ

- ໂຈນີ້ ແຫວນປະເສີດ ຈາກ ສະໂມສອນ ເອສະຣາ

         🔥ການແຂ່ງຂັນບານເຕະ ຊີງແຊ້ມອາຊີ 2027 ຮອບຄັດເລືອກ ( ຮອບສຸດທ້າຍ ) AFC Asian Cup Saudi Arabia 2027 Qualifiers ( Final Round )

📅 ວັນພຸດ 19/11/2025

🇱🇦 ທີມຊາດລາວ 🆚 🇻🇳 ທີມຊາດຫວຽດນາມ

🕗 ເວລາ 19:00

🏟 ສະຫນາມກິລາແຫ່ງຊາດຫຼັກ 16

🎥ຖ່າຍທອດສົດທາງເຟສບຸກ ສະຫະພັນບານເຕະແຫ່ງຊາດລາວ Lao Football Federation

📌ບັດເຂົ້າຊົມ ມີຫລາຍລາຄາດັ່ງນີ້:

- ປະຕູ A1 ສຳລັບແຟນບານທົ່ວໄປ ລາຄາ 50.000 ກີບ

- ປະຕູ A2 ສຳລັບແຟນບານທີມຫວຽດນາມ ລາຄາ 50.000 ກີບ

- ປະຕູ B ສຳລັບແຟນບານທົ່ວໄປ ລາຄາ 10.000 ກີບ

- ປະຕູ C ສຳລັບແຟນບານທົ່ວໄປ ລາຄາ 20.000 ກີບ

- ປະຕູ D ສຳລັບແຟນບານທີມຫວຽດນາມ ລາຄາ 10.000 ກີບ

🔻ສອບຖາມການຊື້ບັດເຂົ້າຊົມໄດ້ທີ່:

ເບີໂທຕິດຕໍ່: +856305266415

ໃນວັນ ແລະ ໂມງລັດຖະການ 9:00-11:30 ແລະ 14:00-17:00

ສາມາດຊື້ບັດເຂົ້າຊົມ ໄດ້ທີ່ ສຳນັງານສະຫະພັນບານເຕະແຫ່ງຊາດລາວ ຕັ້ງຢູ່ທີ່ບ້ານຫ້ວຍຫົງ ເມືອງຈັນທະບູລີ ນະຄອນຫຼວງ

Location: https://maps.app.goo.gl/v3nozHQ54py5kyFc9

            ຄະນະຄູຝຶກທີມຊາດລາວ ຮຸ່ນ U-17 ປີ (ອາຍຸບໍ່ເກີນ 17 ປີ) ໄດ້ປະກາດລາຍຊື່ 23 ຄົນສຸດທ້າຍ ເພື່ອກຽມອອກເດີນທາງເຂົ້າຮ່ວມການແຂ່ງຂັນບານເຕະຊີງແຊັມອາຊີ 2026 ຮອບຄັດເລືອກ (AFC U-17 Asian Cup Saudi Arabia 2026 Qualifiers) ທີ່ເມືອງ ບິສເຄກ, ປະເທດ ຄີກິສຖານ ລະຫວ່າງວັນທີ 22-30 ພະຈິີກ 2025.

            ສໍາລັບ ນັກເຕະ 23 ຄົນມີດັ່ງນີ້:

+ ຜູ້ຮັກສາປະຕູ:

1. ສານຄໍາ ທະວີທົງ ຈາກ ສະໂມສອນ ທີບີ ບໍ່ແກ້ວ

2. ຈັກກະລິນ ໄຊຍະສອນ ຈາກ ສະໂມສອນບານເຕະ ເອສະຣາ

3. ໄຊຍະເພັດ ພຸດທະສີ ຈາກ ສະໂມສອນ ເອສະຣາ

+ ກອງຫຼັງ:

4. ວິໄສທັດ ນັນທະວົງ ຈາກ ສະໂມສອນ ເອສະຣາ

5. ກິ ມູນກັນຍາ ຈາກ ສະໂມສອນ ມັດສະດ້າ ຈີບີ

6. ປະລິນເດດ ເພັດຕະກຸນ ຈາກ ສະໂມສອນ ບີໄອເອັສ ມາສເຕີ້

7. ບຸນທະສັກ ຈັນດາລາ ຈາກ ສະໂມສອນ ຊ້າງນ້ອຍ

8. ເວດສະຫວັນ ວິໄລພັນ ຈາກ ສູນຝຶກ ຈໍາປີ-ຈໍາປີ

9. ອະນຸລັກ ສິງສະຫວ່າງ ຈາກ ສະໂມສອນ ທີບີ ບໍ່ແກ້ວ

10. ⁠ແກ້ວໄກສອນ ໄຊຍະສານ ຈາກ ສະໂມສອນ ເອສະຣາ

11. ຍານະວຸດ ມຸ່ຍພະຈັນ ຈາກ ສູນຝຶກ ຈໍາປີ-ຈໍາປາ

+ ກອງກາງ:

12. ບຸນປະເສີດ ແສງສະຫວ່າງ ຈາກ ສະໂມສອນ ສະຫວັນນະເຂດ

13. ອານຸສິດ ປະດິດ ຈາກ ສະໂມສອນ ມັດສະດ້າ ຈີບີ

14. ສະຫວັນໄຊ ມູນລາດສະວົງ ຈາກ ສະໂມສອນ ສະຫວັນນະເຂດ

15. ທັນຍະວຸດ ໄຊຈະເລີນ ຈາກ ສະໂມສອນ ເອສະຣາ

16. ອາຕິຍະ ອິນທະວົງ ຈາກສະໂມສອນ ເອສະຣາ

17. ພົງສະຫວັນ ບັນດາກອນ ຈາກ ສະໂມສອນ ທີບີ ບໍ່ແກ້ວ

18. ສີສົມບັດ ວິໄລສອນ ຈາກສູນຝຶກ ຈໍາປີ-ຈໍາປາ

19. ພົມມະສອນ ນິລະວົງ ຈາກສະໂມສອນ ມາດສເຕີ້

+ ກອງໜ້າ:

20. ໄຊຍະສິດ ເຄືອບພະພອນ ຈາກ ສະໂມສອນ ເອສະຣາ

21. ສິດທິລາດ ຈັນທະມາລີ ຈາກສະໂມສອນ ມັດສະດ້າ ຈີບີ

22. ໂອດິນ ສີພານິດ ຈາກ ສະໂມສອນ ທີບີ ບໍ່ແກ້ວ

23. ພຸດພະໄຕ ຈັນທະລັງສີ ຈາກ ສະໂມສອນ ຊ້າງນ້ອຍ

           ສໍາລັບ ຄະນະຄູຝຶກ ແລະ ນັກກິລາ ທີມຊາດລາວ U-17 ມີກໍານົດອອກເດີນທາງໃນວັນທີ 17 ພະຈິກ 2025 ເຊິ່ງທີມຊາດລາວ U-17 ໄດ້ຖືກຈັບສະຫລາກຢູ່ກຸ່ມ B ຮ່ວມກັບ ເຢເມນ, ຄີກິສຖານ (ເຈົ້າພາບ), ກໍາປູເຈຍ, ກວມ ແລະ ປາກິດສະຖານ ໂດຍຮອບຄັດເລືອກຈະຄັດເອົາພຽງອັນດັບທີ 1 ຂອງກຸ່ມ ເຊິ່ງມີທັງໝົດ 7 ກຸ່ມ ( A-G ) ເທົ່ານັ້ນ ເພື່ອເຂົ້າຮອບສຸດທ້າຍ ໂດຍປະຈຸບັນມີ 9 ທີມທີ່ໄດ້ສິດເຂົ້າຮອບສຸດທ້າຍໄປກ່ອນໜ້ານີ້ ເຊິ່ງປະກອບມີ: ຊາອຸດິດອາຣັບເບຍ (ເຈົ້າພາບ), ຮອງແຊັມເກົ່າ, ກາຕ້າ ເຈົ້າພາບບານໂລກ U-17, ອຸດສະເບກິດສະຖານ ແຊັມເກົ່າ, ສ ເກົາຫຼີ ກັບ ສປປ ເກົາຫຼີ (ເຂົ້າຮອບ 4 ທີມຄັ້ງທີ່ຜ່ານມາ), ສ່ວນອີກ 4 ທີມປະກອບມີ ຍີ່ປຸ່ນ, ທາຈິດກິດສະຖານ, ສະຫະລັດອາຣັບ ເອມິເຣດ ແລະ ອິນໂດເນເຊຍ (ແມ່ນເຂົ້າຮອບ 8 ທີມສຸດທ້າຍໃນຄັ້ງທີ່ຜ່ານມາ).

ສ່ວນຕາຕະລາງການແຂ່ງຂັນຂອງ ທີມຊາດລາວ U-17 ທີ່ ເມືອງ ບິສເຄກ, ຄີກິສຖານ ມີລາຍລະອຽດດັ່ງຕໍ່ໄປນີ້:

- ວັນທີ 22/11/2025 ເວລາ 16:00 ໂມງ (ເວລາໃນປະເທດລາວ) ທີມຊາດລາວ ພົບ ທີມຊາດກວມ

- ວັນທີ 24/11/2025 ເວລາ 16:00 ໂມງ (ເວລາໃນປະເທດລາວ) ທີມຊາດລາວ ພົບ ທີມຊາດກໍາປູເຈຍ

- ວັນທີ 26/11/2025 ເວລາ 16:00 ໂມງ (ເວລາໃນປະເທດລາວ) ທີມຊາດປາກິດສະຖານ ພົບ ທີມຊາດລາວ

- ວັນທີ 28/11/2025 ເວລາ 20:00 ໂມງ (ເວລາໃນປະເທດລາວ) ທີມຊາດລາວ ພົບ ທີມຊາດຄີກິສຖານ

- ວັນທີ 30/11/2025 ເວລາ 20:00 ໂມງ (ເວລາໃນປະເທດລາວ) ທີມຊາດເຢເມນ ພົບ ທີມຊາດລາວ

       ວັນທີ 08 ພະຈິກ 2025 ທີ່ຜ່ານມາ ທີ່ ສູນຝຶກກິລາບານເຕະ ຈຳປີ-ຈຳປາ (ສະຫນາມກິລາຫຼັກ 16) ໄດ້ມີພິທີປິດການແຂ່ງຂັນບານເຕະເຍົາວະຊົນ ຊີງຂັນ ສະຫະພັນບານເຕະແຫ່ງຊາດລາວ (ສຕລ) ປະຈຳປີ 2025 “LFF Youth Football Competitions” ໃຫ້ກຽດເຂົ້າຮ່ວມພິທີມອບລາງວັນໂດຍ ທ່ານ ຄໍລະເດດ ພອນພະຈັນ ຄະນະບໍລິຫານງານ ສຕລ, ທ່ານ ນາງ ຍອດແກ້ວ ພາວະດີ ເລຂາທິການ ສຕລ, ທ່ານ ຊຸນດຣໍາ (Sundram Moorthy), ຫົວໜ້າພະແນກເຕັກນິກວິທະຍາ, ທ່ານ ເຮີມັນ (Herman Zalaini) ຫົວໜ້າພັດທະນາຄູຝຶກ ສຕລ ພ້ອມດ້ວຍຄະນະຄູຝຶກ, ທີມນັກກິລາ, ຜູ້ປົກຄອງ ແລະ ແຟນບານເຂົ້າຮ່ວມ.

        ການແຂ່ງຂັນບານເຕະເຍົາວະຊົນ ຊີງຂັນ ສຕລ ປະຈຳປີ 2025 ເປັນການແຂ່ງຂັນບານເຕະ 5 ຮຸ່ນອາຍຸ ຄື: ຮຸ່ນອາຍຸບໍ່ເກີນ U10 ຊາຍ, U12 ຊາຍ, U14 ຊາຍ, U16 ຍິງ ແລະ ຊາຍ.

        ຜ່ານການແຂ່ງຂັນສາມາດສະຫລຸບລາງວັນແຕ່ຮຸ່ນອາຍຸໄດ້ດັ່ງນີ້:

+ U10 ຊາຍ

- ອັນດັບ 1 ທີມມະຫາວິທະຍາໄລແຫ່ງຊາດ

- ອັນດັບ 2 ສູນຝຶກບານເຕະ ພົມມະທັດ

- ອັນດັບ 3 ສູນຝຶກບານເຕະ ຄໍາໃສ

+ U12 ຊາຍ

- ອັນດັບ 1 ສູນຝຶກບານເຕະ ເບສະຫວັນ

- ອັນດັບ 2 ສະໂມສອນ ມັດສະດ້າ ຈີບີ

- ອັນດັບ 3 ສູນຝຶກບານເຕະ ພົມມະທັດ

+ U 14 ຊາຍ

- ອັນດັບ 1 ສະໂມສອນ ເອສະຣາ

- ອັນດັບ 2 ສະໂມສອນ ເຟຣນຊິບ

- ອັນດັບ 3 ສູນຝຶກບານເຕະ ເບສະຫວັນ

+ U 16 ຊາຍ

- ອັນດັບ 1 ສະໂມສອນ ເອສະຣາ

- ອັນດັບ 2 ສະໂມສອນ ເອັສທີທີ

- ອັນດັບ 3 ສູນຝຶກບານເຕະ ຈໍາປີ-ຈໍາປາ

+ U 16 ຍິງ

- ອັນດັບ 1 ສະໂມສອນ ເອັສອີຊີ ຢູໄນເຕັດ

- ອັນດັບ 2 ສະໂມສອນ ມາດສເຕີ້

- ອັນດັບ 3 ສູນຝຶກບານເຕະ ຈໍາປີ-ຈໍາປາ

             ສຳລັບຈຸດປະສົງຂອງການແຂ່ງຂັນບານເຕະເຍົາວະຊົນ ຊິງຂັນ ສຕລ ປະຈຳປີ 2025 ກໍ່ເພື່ອພັດທະນາໃຫ້ນັກກິລາໄດ້ຮັບປະສົບການຕົວຈີງຈາກການແຂ່ງຂັນ ພາຍຫຼັງທີ່ໄດ້ມີການຝຶກຊ້ອມມາໄລຍະໜຶ່ງ ພ້ອມດຽວກັນ, ກໍ່ເພື່ອພັກດັນໃຫ້ນັກກິລາຮູ້ຈັກວາງແຜນ ແລະ ກົນລະຍຸນການຫຼິ້ນພາຍໃຕ້ຄວາມກົດດັນ, ສ້າງສາຍສຳພັນ ຄວາມສາມັກຄີລະຫວ່າງນັກກິລາເຍົາວະຊົນຕ່າງສະໂມສອນ ແລະ ສູນຝຶກ ເພື່ອແລກປ່ຽນມິດຕະພາບ, ຮຽນຮູ້ການເຂົ້າສັງຄົມ ແລະ ທີ່ສຳຄັນແມ່ນຮຽນຮູ້ທີ່ຈະແພ້ ແລະ ຊະນະ ເພື່ອກະກຽມຄວາມເຂັ້ມແຂງ ທາງດ້ານຮ່າງກາຍ ແລະ ຈິດໃຈກ່ອນຈະກ້າວເຂົ້າສູ່ທີມລະດັບໃຫຍ່ໃນອະນາຄົດ.

          ສະຫະພັນບານເຕະແຫ່ງຊາດລາວ (ສຕລ) ຈັດກອງປະຊຸມພັດທະນາຄູຝຶກບານເຕະ ສຕລ ປະຈຳປີ 2025 ຂຶ້ນໃນວັນທີ 09 ພະຈິກ 2025, ທີ່ໂຮງແຮມແລກມາກ, ນະຄອນຫຼວງວຽງຈັນ, ໃຫ້ກຽດເຂົ້າຮ່ວມເປີດພິທີໂດຍ ທ່ານ ວີເພັດ ສີຫາຈັກຣ ປະທານ ສຕລ.

 ທ່ານ ວີເພັດ ສີຫາຈັກຣ ໄດ້ກ່າວວ່າ: “ການພັດທະນາຄູຝຶກເປັນໜຶ່ງໃນປັດໃຈສໍາຄັນ ໃນການຍົກລະດັບວົງການກິລາບານເຕະຂອງປະເທດລາວເຮົາ, ເພາະຄູຝຶກແມ່ນຜູ້ທີ່ສ້າງແຜນ ແລະ ຫຼັກສູດການຝຶກແອບໃຫ້ນັກກິລາ ເພາະ ສະນັ້ນ ຄູຝຶກຈະຕ້ອງເປັນແບບຢ່າງທີ່ດີ ບໍ່ວ່າໃນສະໜາມຝຶກຊ້ອມ ແລະ ຢູ່ນອກສະໜາມ.”

          ທ່ານ ວີເພັດ ສີຫາຈັກຣ ໄດ້ໃຫ້ຂໍ້ມູນເພີ່ມເຕີມອີກວ່າ: “ສຳລັບແຜນການຈັດຝຶກອົບຮົມຄູຝຶກໃນປີ 2026, ສຕລ ໄດ້ວາງແຜນຈະຈັດຝຶກອົບຮົມຄູຝຶກບານເຕະ ລະດັບ C ຈໍານວນ 3 ຄັ້ງ, ລະດັບ B ຈຳນວນ 1 ຄັ້ງ ແລະ A ຈຳນວນ 1 ຄັ້ງ ເຊິ່ງເງື່ອນໄຂຫຼັກສໍາຄັນຂອງຄູຝຶກລະດັບ B ທີ່ຈະຖຶກຍົກລະດັບກ້າວເຂົ້າຮຽນໃນລະດັບ A, ຄູຝຶກຜູ້ນັ້ນຕ້ອງມີທີມສະໂມສອນທີ່ເຄື່ອນໄຫວວຽກງານນໍາເປັນປົກກະຕິ ຈຸດປະສົງກໍ່ເພື່ອໃຫ້ເປັນໄປຕາມເກນການປະເມີນ ແລະ ຕາມມາດຕະຖານທີ່ທາງສະຫະພັນບານເຕະອາຊີ (Asian Football Confederation) ໄດ້ວາງອອກ ແລະ ກໍເພື່ອຮັບປະກັນວ່າ ຄູຝຶກມີເງື່ອນໄຂເຂົ້າເຖິງກຸ່ມນັກກິລາ ແລະ ຕິດແທດກັບວຽກງານການແຂ່ງຂັນບານເຕະຢ່າງສະໝໍ່າສະເໝີ.”

          ໃນວາລະດຳເນີນກອງປະຊຸມ, ຜູ້ເຂົ້າຮ່ວມຍັງໄດ້ແລກປ່ຽນບົດຮຽນ, ປະສົບການຕົວຈິງ; ຮັບຟັງການບັນລະຍາຍກ່ຽວກັບ ຂະບວນການເຟັ້ນຫານັກກິລາພອນສະຫວັນ ຜ່ານລະບົບດີຈິຕອນ (Digital), ການວາງແຜນຝຶກຊ້ອມ ແລະ ການປະຊຸມທີມ ໂດຍນຳໃຊ້ Tactical Pad ແລະ ການພັດທະນາຄູຝຶກໃນບານເຕະສະໄໝໃໝ່ເປັນຕົ້ນ. ການຝຶກອົບຮົມນີ້ ໄດ້ຈັດຂຶ້ນເປັນຄັ້ງທີ 2, ເຊິ່ງຄັ້ງທໍາອິດໄດ້ຈັດຂື້ນເມື່ອວັນທີ 12 ຕຸລາ2024 ແລະຄັ້ງນີ້ໄດ້ມີວິທະຍາກອນຈາກຕ່າງປະເທດ, ບັນດາຄູຝຶກບານເຕະ ແລະ ວິຊາການ ສຕລ ເຂົ້າຮ່ວມ, ຈຸດປະສົງເພື່ອສ້າງຊຸມຊົນຄູຝຶກກິລາບານເຕະ ໄວ້ແລກປ່ຽນປະສົບການ, ແນວຄິດ, ຂໍ້ມູນຂ່າວສານ ເພື່ອໄປໝູນໃຊ້ໃນສະໂມສອນ ຫຼື ສູນຝຶກຊ້ອມບານເຕະເຍົາວະຊົນໃນແຕ່ຂົງເຂດທີ່ຄູຝຶກຮັບຜິດຊອບ ເປັນທ່າແຮງໃນການພັກດັນວົງການກິລາບານເຕະໃຫ້ພັດທະນາ ແລະ ຍົກລະດັບຄວາມຮູ້ຄວາມສາມາດຂອງຄູຝຶກບານເຕະລາວໃຫ້ຕໍ່ເນື່ອງ, ທັງໃຫ້ກ້າວທັນຕາມມາດຕະຖານສາກົນ ເຂົ້າກັບຍຸກກິລາບານເຕະສະໄໝໃໝ່ ແລະ ໃຫ້ທັນກັບບັນດາປະເທດອ້ອມຂ້າງ.